Ramayana: రామాయణ మూవీకి షాక్.. వాళ్లకు స్ట్రాంగ్ వార్నింగ్ ఇచ్చిన టీం

Ramayana: రణ్‌బీర్ కపూర్, సాయి పల్లవి, యష్ ప్రధాన పాత్రల్లో నటించిన రామాయణ: పార్ట్ 1 సినిమా నవంబర్ 5న థియేటర్లలో విడుదలైంది. నితేశ్ తివారీ దర్శకత్వంలో నమిత్ మల్హోత్రా నిర్మించిన ఈ చిత్రంపై ప్రేక్షకుల్లో భారీ అంచనాలు ఉన్నాయి. అయితే సినిమా ప్రదర్శన జరుగుతున్న సమయంలో కొందరు ప్రేక్షకులు మొబైల్ ఫోన్లతో కొన్ని దృశ్యాలను రహస్యంగా చిత్రీకరించి సోషల్ మీడియా, మెసేజింగ్ యాప్‌లలో పంచుతున్నట్లు నిర్మాణ సంస్థ దృష్టికి వచ్చింది. దీంతో చిత్ర బృందం పైరసీకి అడ్డుకట్ట వేసేందుకు కఠిన హెచ్చరిక జారీ చేసింది.

కోర్టు ఆదేశాలు.. పైరసీకి చెక్

సినిమా కాపీరైట్ హక్కులను కలిగి ఉన్న గాడ్‌పవర్ మీడియా ప్రైవేట్ లిమిటెడ్ ముంబై హైకోర్టును ఆశ్రయించింది. ఈ కేసులో నవంబర్ 2న, నవంబర్ 6న కోర్టు కీలక ఆదేశాలు జారీ చేసింది. అనుమతి లేకుండా సినిమాను లేదా అందులోని ఏ భాగాన్నైనా రికార్డ్ చేయడం, అప్‌లోడ్ చేయడం, ఇతరులకు పంపడం, ఆన్‌లైన్‌లో అందుబాటులో ఉంచడంపై నిషేధం విధించింది. గుర్తించిన వ్యక్తులతో పాటు ఇంకా గుర్తించని వ్యక్తులు కూడా ఈ ఆదేశాల పరిధిలోకి వస్తారని స్పష్టం చేసింది.

మూడు గంటల్లోనే పైరసీ లింకులు తొలగించాలి

నవంబర్ 6న ఇచ్చిన మరో ఆదేశంలో పైరసీకి సంబంధించిన లింకులు, వీడియోలపై ఫిర్యాదు అందిన తర్వాత ఇంటర్నెట్ సేవల సంస్థలు, డిజిటల్ వేదికలు వెంటనే స్పందించాలని హైకోర్టు పేర్కొంది. ఫిర్యాదు అందిన మూడు గంటల్లోగా సంబంధిత లింకులను తొలగించాలని లేదా వాటికి అందుబాటును నిలిపివేయాలని ఆదేశించింది. ఈ చర్యలు వేగంగా జరిగేలా డిజిటల్ వేదికలు తమ నోడల్ అధికారుల వివరాలను అందించాలని కూడా సూచించింది.

షేర్ చేసినా చట్టపరమైన చిక్కులు తప్పవు

సినిమా దృశ్యాలను అనుమతి లేకుండా చిత్రీకరించి, ఆన్‌లైన్‌లో పంచుకోవడం కాపీరైట్ ఉల్లంఘన కిందకు వస్తుందని చిత్ర బృందం హెచ్చరించింది. కాపీరైట్ చట్టం-1957, సినిమాటోగ్రాఫ్ చట్టం-1952, భారతీయ న్యాయ సంహిత-2023, ఐటీ చట్టం-2000 కింద చర్యలు తీసుకునే అవకాశం ఉందని తెలిపింది. ఈ చర్యలు కోర్టు ధిక్కరణకు కూడా దారితీయవచ్చని పేర్కొంది. నేర తీవ్రత, వర్తించే చట్ట నిబంధనలను బట్టి జరిమానా లేదా జైలు శిక్ష పడే అవకాశం ఉంటుంది.

ఇప్పటికే పోస్టు చేసిన వీడియోలు తొలగించండి

ఇప్పటికే రామాయణ సినిమా క్లిప్స్‌ను సోషల్ మీడియాలో లేదా ఇతర వేదికల్లో పోస్టు చేసిన వారు వెంటనే వాటిని తొలగించాలని చిత్ర బృందం కోరింది. ఇకపై ఎవరూ థియేటర్లలో వీడియోలు తీయకూడదని, అనుమతి లేని దృశ్యాలను ఇతరులకు పంపకూడదని స్పష్టం చేసింది. ఆదేశాలను పట్టించుకోకుండా వీడియోలు పంచుకునే వారిపై ముందస్తు నోటీసు లేకుండానే సివిల్, క్రిమినల్, కోర్టు ధిక్కరణ చర్యలు తీసుకుంటామని హెచ్చరించింది. అవసరమైతే సంబంధిత వ్యక్తులపై అధికారులకు ఫిర్యాదు చేస్తామని తెలిపింది.