Central Govt Jobs: నిరుద్యోగులకు గుడ్ న్యూస్.. డిగ్రీ అర్హతతో 1,393 కేంద్ర ప్రభుత్వ ఉద్యోగాలు

Central Govt Jobs: కేంద్ర ప్రభుత్వ ఉద్యోగాల కోసం ఎదురుచూస్తున్న డిగ్రీ అర్హత ఉన్న అభ్యర్థులకు మంచి అవకాశం వచ్చింది. ఇండియన్ కౌన్సిల్ ఆఫ్ అగ్రికల్చరల్ రీసెర్చ్(ICAR) పరిధిలోని సంస్థల్లో మొత్తం 1,393 ఖాళీల భర్తీకి అగ్రికల్చరల్ సైంటిస్ట్స్ రిక్రూట్‌మెంట్ బోర్డ్(ASRB) నోటిఫికేషన్ విడుదల చేసింది. ఈ నియామకాలను సెంట్రలైజ్డ్ కంబైన్డ్ ఎగ్జామినేషన్-2026 ద్వారా చేపట్టనున్నారు. ఇందులో టెక్నికల్ అసిస్టెంట్(T-3), సీనియర్ టెక్నికల్ అసిస్టెంట్(T-4) పోస్టులు ఉన్నాయి. మొత్తం ఖాళీల్లో 1,254 టెక్నికల్ అసిస్టెంట్ పోస్టులు కాగా, 139 సీనియర్ టెక్నికల్ అసిస్టెంట్ పోస్టులు ఉన్నాయి.

ఏ పోస్టుకు ఎన్ని ఖాళీలు?

ఈ నియామకాల్లో టెక్నికల్ అసిస్టెంట్(T-3) పోస్టులను ఐసీఏఆర్ సంస్థల్లో భర్తీ చేయనున్నారు. సీనియర్ టెక్నికల్ అసిస్టెంట్(T-4) పోస్టులు ఐసీఏఆర్ పరిధిలోని కృషి విజ్ఞాన కేంద్రాల్లో(KVKs) ఉన్నాయి. మొత్తం 1,393 పోస్టులకు నవంబర్ 18, 2026 నుంచి ఆన్‌లైన్ దరఖాస్తులు స్వీకరిస్తారు. అభ్యర్థులు డిసెంబర్ 17, 2026 రాత్రి 11.59 గంటల్లోగా దరఖాస్తు ప్రక్రియతో పాటు పరీక్ష ఫీజు చెల్లించాలి. దరఖాస్తులో తప్పులు ఉంటే డిసెంబర్ 18 నుంచి 20 వరకు సవరణ చేసుకునే అవకాశం కల్పించారు.

విద్యార్హతలు, వయోపరిమితి ఇవే

ఈ ఉద్యోగాలకు సంబంధిత విభాగంలో బ్యాచిలర్ డిగ్రీ పూర్తి చేసినవారు దరఖాస్తు చేసుకోవచ్చు. అయితే అన్ని డిగ్రీలు ఉన్నవారూ అర్హులు కారు. అభ్యర్థులు ఎంచుకునే విభాగాన్ని బట్టి వ్యవసాయం, వెటర్నరీ సైన్స్, ఫిషరీస్, ఇంజినీరింగ్, లైబ్రరీ సైన్స్, కంప్యూటర్ అప్లికేషన్స్, ఐటీ తదితర సంబంధిత సబ్జెక్టుల్లో నిర్దేశించిన విద్యార్హత ఉండాలి. కొన్ని వర్క్‌షాప్ విభాగాలకు బీఈ/బీటెక్ లేదా మూడేళ్ల ఇంజినీరింగ్ డిప్లొమా అర్హతను కూడా కల్పించారు. డిసెంబర్ 17, 2026 నాటికి విద్యార్హత పూర్తి చేసి ఉండాలి. అభ్యర్థుల వయస్సు అదే తేదీ నాటికి 21 నుంచి 30 ఏళ్ల మధ్య ఉండాలి. ఎస్సీ, ఎస్టీలకు ఐదేళ్లు, ఓబీసీ నాన్‌-క్రీమీలేయర్‌కు మూడేళ్లు, దివ్యాంగులకు పదేళ్ల వరకు వయోసడలింపు ఉంటుంది. మాజీ సైనికులకు ప్రభుత్వ నిబంధనల ప్రకారం మినహాయింపు ఉంటుంది.

ఇది కూడా చదవండి: Weather Update: బంగాళాఖాతంలో అల్పపీడనం.. ఏపీకి వర్ష సూచన, తెలంగాణలో చలి

ప్రిలిమ్స్, మెయిన్స్ పరీక్షలతో ఎంపిక

ఈ పోస్టులకు అభ్యర్థులను రెండు దశల్లో నిర్వహించే కంప్యూటర్ ఆధారిత పరీక్షల ద్వారా ఎంపిక చేస్తారు. మొదట ప్రిలిమినరీ పరీక్ష నిర్వహిస్తారు. ఇందులో అర్హత సాధించిన అభ్యర్థులను మెయిన్స్ పరీక్షకు ఎంపిక చేస్తారు. ప్రిలిమినరీ పరీక్షను 2027 ఫిబ్రవరిలో నిర్వహించనున్నట్లు బోర్డు తెలిపింది. మెయిన్స్ పరీక్ష తేదీని తర్వాత ప్రకటించనుంది. ఈ నియామకాల్లో ఇంటర్వ్యూ ఉండదు. మెయిన్స్ పరీక్షలో సాధించిన మార్కుల ఆధారంగా తుది ఎంపిక చేపడతారు. అభ్యర్థులు తాము ఎంచుకునే విభాగానికి సంబంధించిన సిలబస్, పరీక్ష విధానాన్ని నోటిఫికేషన్‌లో పరిశీలించాలి.

ముఖ్యమైన తేదీలు.. ఎలా దరఖాస్తు చేయాలి?

ఈ నియామకాలకు సంబంధించిన నోటిఫికేషన్ నవంబర్ 11, 2026న విడుదలైంది. నవంబర్ 18 నుంచి దరఖాస్తుల ప్రక్రియ ప్రారంభమవుతుంది. డిసెంబర్ 17 చివరి తేదీ. డిసెంబర్ 18 నుంచి 20 వరకు దరఖాస్తుల సవరణకు అవకాశం ఉంటుంది. ఆసక్తి ఉన్న అభ్యర్థులు ముందుగా అధికారిక వెబ్‌సైట్ https://asrb.gov.inను సందర్శించాలి. అక్కడ సెంట్రలైజ్డ్ కంబైన్డ్ ఎగ్జామినేషన్-2026 దరఖాస్తు లింక్ ద్వారా రిజిస్ట్రేషన్ పూర్తి చేయాలి. తర్వాత సంబంధిత విభాగం, పోస్టుల ప్రాధాన్యతలను ఎంచుకుని అవసరమైన ధ్రువపత్రాలను అప్‌లోడ్ చేయాలి. ఫీజు వర్తించే అభ్యర్థులు ఆన్‌లైన్‌లో చెల్లించి దరఖాస్తును సమర్పించాలి. దరఖాస్తు చేసే ముందు పూర్తి నోటిఫికేషన్‌లోని విభాగాల వారీ అర్హతలు, ఖాళీలు, పరీక్ష వివరాలను తప్పనిసరిగా పరిశీలించాలి.