Chiranjeevi: డీప్ఫేక్లపై చిరంజీవి పోరాటం.. కేంద్రానికి వినతిపత్రం

Megastar Chiranjeevi: టెక్నాలజీ పెరుగుతున్న కొద్దీ దాని వల్ల ఉపయోగాలు ఎంతగా ఉన్నాయో.. దుర్వినియోగం వల్ల సమస్యలు కూడా అంతే స్థాయిలో పెరుగుతున్నాయి. ముఖ్యంగా ఆర్టిఫిషియల్ ఇంటెలిజెన్స్ సాయంతో ఇతరుల ముఖాలు, గొంతులను ఉపయోగించి నకిలీ వీడియోలు సృష్టించడం ఆందోళన కలిగిస్తోంది. ఈ డీప్ఫేక్ల సమస్యపై మెగాస్టార్ చిరంజీవి మరో కీలక అడుగు వేశారు. కళాకారులతో పాటు సామాన్య ప్రజల డిజిటల్ గుర్తింపును కాపాడేందుకు కఠినమైన చర్యలు తీసుకోవాలని కేంద్ర ప్రభుత్వాన్ని కోరారు. కేంద్ర మంత్రి జి. కిషన్రెడ్డిని కలిసి ఈ అంశంపై వినతిపత్రం సమర్పించినట్లు సమాచారం.
అమిత్ షా సూచనతో కిషన్రెడ్డికి వినతి
ఇటీవల హైదరాబాద్లో కేంద్ర హోంమంత్రి అమిత్ షాను చిరంజీవి, రామ్ చరణ్ కలిశారు. ఆర్టిఫిషియల్ ఇంటెలిజెన్స్, డీప్ఫేక్ టెక్నాలజీ దుర్వినియోగం వల్ల కళాకారుల వ్యక్తిగత గౌరవం, హక్కులు, సృజనాత్మక పనులకు ముప్పు ఏర్పడుతోందని వివరించారు. ఈ సమస్యను పరిశీలించి తగిన రక్షణ చర్యలు తీసుకుంటామని అమిత్ షా హామీ ఇచ్చినట్లు చిరంజీవి అప్పట్లో వెల్లడించారు. దీనిపై రాతపూర్వకంగా వినతిపత్రం ఇవ్వాలని సూచించడంతో పాటు, సంబంధిత వ్యవహారాన్ని సమన్వయం చేయాల్సిందిగా కిషన్రెడ్డికి బాధ్యత అప్పగించారు. ఆ సూచన మేరకు తాజాగా చిరంజీవి కిషన్రెడ్డిని కలిసి వినతిపత్రం అందించారు.
కళాకారులకే కాదు.. ప్రతి ఒక్కరికీ ముప్పు
డీప్ఫేక్ వీడియోలతో ఒక వ్యక్తి మాట్లాడని మాటలను మాట్లాడినట్లు, చేయని పనులను చేసినట్లు చూపించే అవకాశం ఉంది. ప్రముఖుల ఫొటోలు, వీడియోలు, గొంతులను అనుమతి లేకుండా ఉపయోగించి తప్పుడు ప్రచారం చేయడం, పరువు తీసేలా కంటెంట్ తయారు చేయడం వంటి ఘటనలు పెరుగుతున్నాయి. ఇలాంటి చర్యలు సినీ ప్రముఖులకే పరిమితం కావు. సాధారణ ప్రజల ఫొటోలు, వ్యక్తిగత వివరాలను కూడా దుర్వినియోగం చేసే ప్రమాదం ఉంది. అందుకే కళాకారుల డిజిటల్ హక్కులతో పాటు ప్రతి పౌరుడి వ్యక్తిగత గౌరవం, భద్రతకు చట్టపరమైన రక్షణ కల్పించాలని చిరంజీవి తన వినతిపత్రంలో కోరినట్లు తెలుస్తోంది.
టెక్నాలజీ మంచికే ఉపయోగపడాలి
ఈ అంశంపై చిరంజీవి సోషల్ మీడియా వేదికగా కూడా స్పందించారు. సాంకేతికత సృజనాత్మకతను పెంచేందుకు ఉపయోగపడాలి తప్ప.. ఎవరి గౌరవాన్ని దెబ్బతీసే సాధనంగా మారకూడదని స్పష్టం చేశారు. కళాకారులు, సాధారణ ప్రజల గుర్తింపును కాపాడటం అందరి బాధ్యతని పేర్కొన్నారు. డిజిటల్ వేదికలపై జరుగుతున్న దుర్వినియోగాన్ని అడ్డుకోవడానికి ప్రతి ఒక్కరూ కలిసి రావాలని పిలుపునిచ్చారు. ఈ సందర్భంగా #UniteAgainstDigitalAbuse అనే హ్యాష్ట్యాగ్ను జోడించారు. సంబంధిత మంత్రిత్వ శాఖలతో చర్చించి తగిన చర్యలు తీసుకుంటామని కిషన్రెడ్డి హామీ ఇవ్వడంపై చిరంజీవి కృతజ్ఞతలు తెలిపారు.
ఇప్పటికే కేంద్రం తీసుకున్న చర్యలివే
డీప్ఫేక్ల సమస్యపై కేంద్ర ప్రభుత్వం ఇప్పటికే కొన్ని నిబంధనలను అమల్లోకి తెచ్చింది. 2026 ఫిబ్రవరిలో ఐటీ నిబంధనలకు చేసిన సవరణల ప్రకారం, అనుమతించదగిన ఏఐ ఆధారిత కంటెంట్ను గుర్తించేలా స్పష్టమైన లేబుళ్లు, గుర్తింపు వివరాలు ఉండాలి. వ్యక్తుల గుర్తింపును తప్పుగా చూపించే, అసభ్యకరమైన లేదా చట్టవిరుద్ధమైన కృత్రిమ కంటెంట్పై సోషల్ మీడియా వేదికలు చర్యలు తీసుకోవాలి. ఫిర్యాదుల పరిష్కారం, అభ్యంతరకర కంటెంట్ తొలగింపునకు కూడా గడువులను తగ్గించారు. ఈ నేపథ్యంలో మరింత సమర్థమైన రక్షణ, బాధ్యులపై కఠిన చర్యలు ఉండాలని చిరంజీవి కోరడం ప్రాధాన్యం సంతరించుకుంది.

Bigg Boss 10 : బిగ్ బాస్ హౌస్ నుంచి వైల్డ్ కార్డ్ బ్యూటీ అవుట్.. స్టేజీ పైనే కన్నీళ్లు పెట్టుకున్న శ్వేత
Bigg Boss 10: కెప్టెన్సీ టాస్క్లో రచ్చ రచ్చ.. ముకేష్ వర్సెస్ వర్షిణి మధ్య తీవ్ర వాగ్వాదం
Mahesh Babu: మహేశ్ బాబు ఇంట్లో పెళ్లి సందడి.. వైరల్ అవుతున్న ప్రీ వెడ్డింగ్ ఫొటోలు
Ramayana: రామాయణ మూవీకి షాక్.. వాళ్లకు స్ట్రాంగ్ వార్నింగ్ ఇచ్చిన టీం