బుధవారం, నవంబర్ 18, 2026
తెలుగు వార్తలు... మీ కోసం...
తాజా వార్తలు:

MS Dhoni: రూ.1,000 కోట్లకు పైగా సంపద? ధోనీ వ్యాపార సామ్రాజ్యం గురించి తెలుసా?

MS Dhoni

MS Dhoni: క్రికెట్‌లో తనదైన ముద్ర వేసిన ధోనీ.. సంపాదించిన డబ్బును ఒకే రంగంలో పెట్టకుండా వివిధ వ్యాపారాల్లో పెట్టుబడులు పెట్టారు. ఎలక్ట్రిక్ వాహనాలు, ఫిన్‌టెక్, డ్రోన్ టెక్నాలజీ, ఫుడ్ బిజినెస్, హోమ్ ఇంటీరియర్స్ వంటి రంగాల్లో ఆయన పెట్టుబడులు ఉన్నాయి. CARS24, Khatabook, Garuda Aerospace, EMotorad, HomeLane, Rigi, Shaka Harry, 7Ink Brews, Tagda Raho వంటి సంస్థలతో ధోనీకి సంబంధాలు ఉన్నాయి. అయితే ఈ సంస్థల్లో ఆయన పెట్టుబడి మొత్తం, వాటాల వివరాలు ఒక్కో కంపెనీకి ఒక్కోలా ఉన్నాయి.

సొంత బ్రాండ్లు.. క్రీడా జట్లలోనూ భాగస్వామ్యం

ధోనీ ఇతర కంపెనీల్లో పెట్టుబడులు పెట్టడమే కాకుండా సొంత వ్యాపారాలపైనా దృష్టి పెట్టారు. స్పోర్ట్స్ దుస్తుల బ్రాండ్ Seven, జిమ్‌ల నిర్వహణకు సంబంధించిన SportsFit World ఆయన వ్యాపార ప్రయాణంలో ముఖ్యమైనవి. ఫుట్‌బాల్, హాకీ, మోటార్‌స్పోర్ట్స్ వంటి రంగాల్లోనూ జట్లతో ఆయనకు అనుబంధం ఉంది. చెన్నైయిన్ ఎఫ్‌సీ, రాంచీ రేస్, మాహి రేసింగ్ టీమ్ ఇండియా వంటి క్రీడా సంస్థల్లో ఆయన భాగస్వామ్యం ఉన్నట్లు గతంలో వార్తలు వచ్చాయి. రాంచీలో హోటల్ మాహి రెసిడెన్సీతో పాటు ధోనీ ఎంటర్‌టైన్‌మెంట్ అనే సినిమా నిర్మాణ సంస్థ కూడా ఆయన వ్యాపారాల్లో భాగంగా ఉన్నాయి.

రాంచీలో వ్యవసాయం.. సేంద్రియ పద్ధతుల్లో పంటలు

ధోనీకి వ్యవసాయం అంటే కూడా ఆసక్తి ఉంది. జార్ఖండ్‌లోని రాంచీ సమీపంలో ఉన్న తన ఫామ్‌హౌస్‌లో పండ్ల తోటలు, కూరగాయల సాగుకు ప్రాధాన్యం ఇచ్చారు. మామిడి, జామ, బొప్పాయి, అనాస వంటి పండ్లతో పాటు టమాటా, బఠానీ, బ్రోకలీ వంటి కూరగాయలను కూడా పండించినట్లు పలు నివేదికలు వెల్లడించాయి. సేంద్రియ పద్ధతుల్లో సాగు చేయడం, పశువుల ఎరువును వినియోగించడం వంటి విధానాలపైనా దృష్టి పెట్టారు. అక్కడ పండించిన పంటలను రాంచీ స్థానిక మార్కెట్లకు సరఫరా చేసినట్లు వార్తలు వచ్చాయి.

ఇది కూడా చదవండి: AP Govt Scheme: ఏపీలో ఆటో డ్రైవర్లకు గుడ్ న్యూస్.. రూ.231 కోట్ల విడుదలకు ప్రభుత్వం ఉత్తర్వులు

కడక్‌నాథ్ కోళ్లు.. పౌల్ట్రీ వ్యాపారంపైనా ఆసక్తి

వ్యవసాయంతో పాటు కోళ్ల పెంపకంపైనా ధోనీ ఆసక్తి చూపించారు. మధ్యప్రదేశ్‌లోని ఝాబువా ప్రాంతానికి ప్రత్యేకమైన కడక్‌నాథ్ కోళ్లను పెంచేందుకు ఆయన తన ఫామ్‌హౌస్‌లో ఏర్పాట్లు చేశారు. 2022 ఏప్రిల్‌లో ఝాబువాలోని ఓ సహకార సంస్థ నుంచి రాంచీ ఫామ్‌హౌస్‌కు 2,000 కడక్‌నాథ్ కోడి పిల్లలు పంపినట్లు అప్పట్లో వార్తలు వచ్చాయి. నల్లటి రంగులో ఉండే ఈ కోడి మాంసానికి ప్రత్యేక గుర్తింపు ఉంది. 2018లో దీనికి జీఐ ట్యాగ్ కూడా లభించింది.

డెయిరీ ఫార్మింగ్.. ప్రకటనలతోనూ భారీ ఆదాయం

ధోనీ ఫామ్‌హౌస్‌లో పశుపోషణ, పాల ఉత్పత్తి కార్యకలాపాలు కూడా సాగినట్లు నివేదికలు వెల్లడించాయి. సాహివాల్, హోల్స్టీన్ ఫ్రిజియన్ వంటి జాతుల ఆవులను అక్కడ పెంచినట్లు సమాచారం. 2021లో వచ్చిన ఓ నివేదిక ప్రకారం అప్పట్లో ఫామ్‌హౌస్‌లో సుమారు 73 ఆవులు ఉండేవి. వాటి నుంచి వచ్చిన పాలను రాంచీలోని పలు ప్రాంతాలకు సరఫరా చేసేవారని ఫామ్ మేనేజర్ అప్పట్లో తెలిపారు. మరోవైపు ప్రముఖ కంపెనీల ప్రకటనల్లో కనిపించడం ద్వారా కూడా ధోనీకి ఆదాయం వస్తోంది. Kroll 2025 సెలబ్రిటీ బ్రాండ్ విలువ నివేదికలో ధోనీ బ్రాండ్ విలువ 115.3 మిలియన్ డాలర్లుగా అంచనా వేశారు. ఇది ఆయన వ్యక్తిగత ఆస్తి విలువ కాదు. ధోనీ మొత్తం సంపద రూ.1,000 కోట్లకు మించి ఉంటుందనే అంచనాలు కూడా మీడియా నివేదికల్లో మాత్రమే కనిపిస్తున్నాయి.

WHAT'S YOUR REACTION?

CH. Rakesh Reddy

చింత రెడ్డి రాకేష్ రెడ్డి సీనియర్ జర్నలిస్ట్, డిజిటల్ న్యూస్ రైటర్. తెలుగు జర్నలిజం రంగంలో 12 ఏళ్లకు పైగా అనుభవం కలిగిన ఆయన సాక్షి, వెలుగు, సమయం, ఎన్టీవీ, వన్ ఇండియా వంటి ప్రముఖ మీడియా సంస్థల్లో పనిచేశారు. బిజినెస్, ఆటోమొబైల్, సినిమా, లైఫ్‌స్టైల్, క్రీడలు, రాజకీయాలు, వైరల్ వార్తలు సహా అనేక విభాగాల్లో వార్తా కథనాలు రూపొందించడంలో ఆయనకు మంచి అనుభవం ఉంది.